१.
दुखः मी तोलू कशाला?
आसवे जोडू कशाला?
भंगलेले मन बघाया;
आरसे शोधू कशाला?
मी तसा निर्दोष सुटतो;
कायदे मोडू कशाला?
उंबरे माझेच सारे;
गाव मी सोडू कशाला?
शब्द माझा शब्द आहे;
नाव मी खोडू कशाला?
तोच जर माझ्यात आहे;
हात मी जोडू कशाला?
२.
हुंदक्यांनी लाख केली आर्जवे;
सारखे ओठावरी हासू हवे.
आसवांचा आडपडदा दूर कर;
एकदा बोलून घे दु:खासवे.
रंगलो नाही कधी जागेपणी;
कोण देतो रंग स्वप्नांना नवे.
छाटल्या फांद्या निराशेच्या किती;
एवढेसे सूख आता पालवे.
संप,दंगा,घोषणा झाल्या सुरू;
जो इथे खाईल त्याला खवखवे.
लोक सारे वाटती आता मला;
पारधी निवडून देणारे थवे.
लाट प्रेमाची नसे साधीसुधी;
बेट प्रेमाचे तिलाही जाणवे.
विसरणे असते तसे सोपेच पण
नेमक्या वेळी नको ते आठवे.
३.
कोणत्या बागेतुनी येशी सुवासा;
टाकला कुठल्या फुलांनी हा उसासा.
रान होते लाख चकव्यांचे तरीही;
पाय वाटेचा मला होता दिलासा;
दाटते ह्रदयात जे ते ओघळू दे;
भार झाला हा;अबोल्याने खुलासा.
शेवटी हातात उरते एकटेपण;
आठवांना पाहिजे तितके तपासा.
साद असते ती मला तू घातलेली;
दाद घेतो मैफली मधला तुझा सा.
काय घडते सांगना ठरल्या प्रमाणे;
हाय दैवाचा कसा उलटाच फासा.
बरस तू किंवा कधी बरसू नको पण
भाकरीचा देत जा तुकडा जरासा;
मी कसा आहे मला ठाऊक नाही;
मी जसा आहे तसा दिसतो जरासा.
४.
तुझे तुला तू उमलत ठेव;
भले मला तू झुलवत ठेव.
तुझा चेहरा दे गाण्याला;
तुझी देखणी हरकत ठेव.
वजीर होइल नशीब तुझे;
सध्या प्यादे सरकत ठेव.
तोल मनाचा ढळू न देता;
खुशाल पाउल घसरत ठेव.
अर्थ तुझ्या ओळीला येइल;
अक्षर अक्षर गिरवत ठेव.
मरणानेही व्याकुळ व्हावे;
जीव जिवाला जडवत ठेव.
५.
कितीदा टाळली स्वप्ने;
तरी रेंगाळली स्वप्ने.
कशाला रातराणीने;
उगाचच माळली स्वप्ने.
मला शोधू नका कोणी;
मला कंटाळली स्वप्ने.
जरासा मोकळा झालो;
जराशी ढाळली स्वप्ने.
पुन्हा मी रात्र पांघरली;
उरी कवटाळली स्वप्ने.
मला तू टाळले तेव्हा;
कोणत्याही टिप्पण्‍या नाहीत:
टिप्पणी पोस्ट करा